ايموشن عامل دكتور نفساني :)

وبإيحاء ابليكيشن ask الجديد ال انتشر بسرعة مزهلة وأنا عن نفسي يعني حبيته
سألت ذات نفسي سؤال امبارح بالليل وأنا مش عارفة أنام

هو احنا ليه بنحب نبقا احنا ال ع كرسي الاعتراف ؟
أو لما نلعب الصراحة مع اصحابنا نحب نتسئل ؟

رغم إن الموضوع بيبقا فيه فضايح كتير

توصلت للسر الرهيب

إننا بس بنحب إن الضوء يبقا مُسلًط علينا

يعني بنحب نكون احنا محور الاهتمام
محور الحديث

زي الطفل الصغير ال بيعمل نفسه عيَان عشان أمه تسيب أخوه ال لسة مولود وتبصله !



ويمكن عشان نزعة الانا بردو بس من ناحية تاني

ال هي إنك بتحب تتكلم عن نفسك
كلنا كدة

بس عشان محدش يتهمنا بالغرور بنلم لسانا ونسكت

رغم إن دة بردو غلط يعني بس مش موضوعنا

فمبنصدق نلاقي فرصة عشان نتكلم عن نفسنا


ويمكن من ناحية تالتة خااااااااااالص
إننا ما بنصدق نحكي

تلاقي الواحد يقعد يحكي أول صدمة ليه ف حبيبته ف صديقه ف أخوه

بيحكي مشكلته ف الكلية أو حاجة محدش يعرفها

ومابنصدق نلاقي مجال ونلاقي كمان حد يسمعنا

!!!


فلسفة لذة كرسي الاعتراف بالنسبة لي بردو لسة مش مفهومة بس لسة واصلة لدة الفجر بس !!


# مدونة زهرة البانسيه
http://pancyrosa.blogspot.com/