ليه خايفين م الاسلام؟

ليه خايفين م الاسلام دة الاسلام والله غلبان

لو في ناس غلطو زمان فمش كل زمان زي زمان

ادو فرصة لينا كمان نحقق حاجة ف البلدان

وجدي وجدك ياما قالو ال يخاف م العفريت يطلعله مهما وصل ومهما كان

يمكن العلماني يقلبها ويمكن يعدلها سلفي واخوان

والله بالنية نتماسك وربنا هو المنان

لوحده نصلي وندعيله ياربي ولي علينا كل كويس وابعد عنا كل الشراني

ماكان عمر بن عبدالعزيز ف بدايته  زي جدوده من بني امية ولما اتولي اتصلح واصلح وكان عدله مضرب مثل طول الازمان

ادو بس فرصة لغيركو ومش احنا بنختار ؟ سيبو الناس تختار ومتخافوش نور الله بيصلح والاسلام خير الاديان

لذلك وجد الاصدقاء

ولذلك وجد الأصدقاء

لكي تبثهم شحنات قلبك السلبية ومشاعرك السيئة لتشعر بعدها أنك أفضل من غيرك في هذا العالم إن لم تكن الأسعد فيه فتبتسم وتقول ((إيه العبط ال انا فيه دة))

لكي تناقشه في مشكلة ما تخصك وأنت في قمة الغضب فيقول لك ((ياعبيط انت اهبل بطل العصبية دي ع الفاضي بإذن الله هتتحل متقلقش ))

لكي تخبره بأنك تريده في التو واللحظةعلي الهاتف وقبل ماتغلق الهاتف تجده أمامك يقول لك ((كنت عاوزني ياباشا ؟؟ خير ))

لكي تقول له إنك خجل من نفسك لأنك أخطأت في كذا وكذا فيقول لك ((يابني انت حد يتكسف من نفس زي نفسك دي ))

لكي ينظر في عينيك فيقول لك (( إنت بتحب فلانة صح  يسهلو ياعم ))

لكي تشكي له من أبويك فيقول لكلا (( والله أبوك دة راجل سكرة بس انت ال مفتري ))

لكي يقول لك عند الآذان (( قوم اتوضا عشان نصلي ولا نويت تغير الديانة ف البطاقة !!))

لكي يأتيك صبيحة الامتحان قائلا ((متوتر ليه ياكبير ربنا معاك بس متنسانيش بقا اما ربنا يقف جنبك :))

أتمناه حنونا يفهمني ويذكرني في كل لحظة أنه يحبني

أريد أن يعاملني بالنقيض صغيرته أنا فيداعبني كطفلة وأميرته أنا فيكون هو ملكي وتاجي
يغضبني وأغضب ولا يغضب قلبي ويعود فيصالحني ويبالغ في ارضائي
يلعب معي كأنني ابنته ويحكي لي همه ويأخذ بآرائي
يجعلني أدرس حياته درسا ويعلمني بكل لحظة وكل حدث مر به في أيامه
يستشيرني في كل صغيرة وكبيرة في لون بدلته وماذا سيشتري لأمه في العيد
يقحمني في عمله بالشكوي والسعادة ليجعلني به ماهرة أكثر منه ربما يوكلني بعضه في يوم من الأيام :))
أريده حافظا لكل كلمة بيننا ولا ينسي أبدا ماقد فات منذ كنا أشقياء صغار

كنا وبقينا !!

بفرح لما افتكر أيام زمان أيام المدرسة ماكانت إسلامية كان ال يلاقي مسطرة يقف وسط الفصل علي  أعلي تختة ويقول ((بتاعت مين دي )) لحد ماصوته يتنبح

 أما كانت الميس تخرج وتوقف حد مننا ع الفصل وتلاقي البنت بتعيط عشان مش عاوزة تكتب اسم صاحبتها ع السبورة وف نفس الوقت مش عاوزة تكدب ع الميس

أما كنا نقف أول ما المدرس يدخل ونرد السلام كااااااااااااااامل أما كان لبس المدرسة مقدس لما كان الواجب هو أهم مهماتنا وحصة الألعاب هي مكافئتنا ومنتهي الظلم إنه تتلغي حصتنا

 وحصة القرآن مين فينا هيكون حافظ أكترنا ونتسابق ع المصلية عشان نصلي ورا الأستاذ بتاعنا

 ومنقطفش وردة محطوطة ف الجنينة ولا ورقة شجر الا لو وقعت حزينة

أما تكون الضحكة لولد ضحكة بريئة من غير أي نظرات دنيئة وشوشنا كلها كسوف منهم وبنبعد عنهم باي طريقة

راح فين دة دلوقتي؟؟
أما كلنا بنقول الإسلام مش كلام وبيكون جوانا خاطر شيطاني إبعدو عننا النصيحة

أما تلاقي حاجة كبيرة مش بتاعتك تاخدها وتستحلاها من أول الفلوس ال واقعة ف الشارع لحد البنت ال بتغدر بيها!!

الغدر بين الأصحاب بقا عادي وإنك تلتمسله عذر ف غلطه دة العيب أكنك إنك موكل من الإله عشان تعاقبه ع ذنوبه بدل ماتقف جنبيه !!

 بقا الكدب هو السايد بين الساسة والكبار والصغار والمخطوبين والاصحاب والمتجوزين والاخوات حتي بنكدب ع نفسينا!!

أما سلامنا بقا هاي وباي ونسينا حتي كلامنا وحكاوينا!!
 وبقا الكبير مش مهم وبنقارنه ديما بينا !!
 أما اللبس بقا ال تضيق اكتر تبقا أحلي وال تقصر أكتر تبقا أجمل وال يسقط بنطلونه قمر وال يفتح قميصه جنتل !!!

 أما بقا آخر اهتماماتنا تعليمنا ونهضتنا وأهم حاجة آخر كليب وآخر موضة:((

 والترفيه بالنسبة لنا رحلة بناتي مع الولاد او ولادي مع البنات أو سهرة حلوة ع ناصية أو ف نادي نعاكس أو نتعاكس مفرقتش

 وال يقول قولو يارب يبقا معقد والقراية ف مجلات الإذاعة والتليفزيون وموضة فاشون وياعالم اخترعو تاني ايه!!

 وال يستأذن عشان يصلي نضحك ونقوله بركاتك !! وأما نعدي من قدام الجامع منفتكرش امتي دخلناه!!
 والمصلية ف البيت زينة يمكن حد من الضيوف يعوزها ف ليلة!!

 حتي الورد قطفناه وقطفوه عشان يضحكو بيه علينا بقصص حب كلها رخيصة..

نظرة وكلمة وموعد ولقاء حصل أو محصلش نحكيه ولا بقينا نخاف ع سمعة بعضينا!!
وبقت البنت تروح تقوله بحبك ويارتنا حتي فاهمين معني بحبك ؟؟؟؟ حتي دلوقتي عارف ان بحبك يعني تتجوزيني ؟؟؟ ولا وسط التوهان بقا في فرق بين الحب ال اخرته الجواز والحب الرخيص المجاني!!

معلش أنا مش ملاك بس مش عاجبني حالنا ولا عاجبني حالي أنا همشي مش همشي واسيبكو بس هتلاقوني واحدة جديدة شكل ال عرفتوها بس بروح تاني

صاحبك مين؟

صاحبك يعني ايه صاحبك؟

صاحبك ال لما تضحك يضحك وال لما تزعل ميستجريش يضحك حتي بينه وبين نفسه!!

صاحبك ال لما يحزن تحس ان قلبك انخلع وراه ولما يفرح ولو من حاجة بسيطة تقعدو تتنططو اكن واحد فيكم طلع الفضاء لاول مرة ف التاريخ!

صاحبك ال لما تحكيله يبقا سترك وغطاك 

ال مهما تعمل فيه يستحملك وميرجعش يذلك ولا يقولك انا استحملت منك!!

ال بيسامحك ويقبلك 70 مليون عذر 

ال يعرف انت بتفكر ازاي وليه وامتي قبل ماتفكر

ال يعرف ازاي يخليك احسن

ال لو معرفش يحل معاك المشكلة يطمنك ويريح قلبك حتي لو معكوك عك السنين

ال يجمعك بيه حب ربنا قبل حبه هو

ال يشوف غلطك وقسوتك علي نفسك ف تانيب الضمير ويقولك معلش يعني هو احنا ملايكة ماكلنا بنغلط!!

ال بيداري عليك ويبينك للناس ملاك حتي لو جواك شيطان

ال لما تبقو ماسكين ف خناق بعض ييجي واحد يسلم عليكو تضحك ولا كانكو كنتو بتتخانقو واما يمشي تكملو من غير مايحس

ال عمرك ماتحس انك غريب عنه وتتصرف بكل طبيعية قدامه

ال عارفك اكتر من نفسك

ال مبتخافش تعترفله بغلطك

الجدع ال بيدافع عنك حتي لو غلطان

صاحبك هو صاحبك

ال متقعدش 3 ساعات ع بعض من غير ماترغي معاه ف التليفون او ييجي ع بالك

ال بتفكرو مع بعض ف نفس الحاجة ف نفس الوقت وتفهمو بعض من غير كلام 

هو دة صاحبك الصح 

هو دة ال تبقا عليه

ولا يزال البحث جاريا